自從香港合法投注外國球賽，報章體育版撥出大部份篇幅報道外國球賽資訊，本地足球無可避免地簡化。從另一面睇，由於過去幾年本地足球嘅吸引力唔及外國，球迷對新一代球員認識不多，難建親切感吧！難得今年本地足運在南華帶動下略見起色，連續兩周入場人數都達3,000以上，希望愈來愈好吧！
講起南華，原來佢哋件波衫個設計意念係嚟自阿仙奴！咁啱今晚就有場阿仙奴主場對愛華頓，睇真吓有冇南華feel先！
阿仙奴開季狀態麻麻係事實，有人歸究球員未習慣新主場，亦有人話覺亨利無心戀戰，球隊進攻速度明顯唔及以前。但阿仙奴近9場取8勝嘅成績，相信可以將之前所有負面批評全部掃走；周中聯賽盃阿仙奴起用大批二線兵作客淨勝西布朗兩球，呢場波除收練兵之效外，仲可以畀一眾主力休息，應付聯賽同歐冠盃雙戰線。
愛華頓排名難作準
相反，愛華頓周中要派全數正選球員踢盃賽，話雖輕取對手，但對於以體力壓迫打法為主嘅愛華頓嚟講，始終打咗折扣。雖然愛華頓𠵱家排第6，但今季除打吡戰對過利物浦後，仲未遇過實力分子，所以不必太睇重聯賽排名。加上對上10季雙方對賽，阿仙奴主場全勝，咁想唔捧多年主勝都唔得啦！
強尼
有線球彩台主持
電郵：[email protected]
PHONE波熱線：1831678