鄔醫生走咗、羅德丞病危、霍老又不時傳病危，愛國愛港陣營老嘅老、走嘅走，淨番落嚟嘅人睇怕買少見少。有親北京人士話，中央都有注視呢個問題，希望可以搵多幾個信得過嘅人，好似譚惠珠咁就係啦。
呢個人士話，珠姐喺北京都算有份量，話晒佢多年服務港英政府，又係行政立法兩局議員，明白香港點運作，佢提嘅意見北京都會參考，好似特首候選人要人大提名咁，中央都有重視同研究㗎！
事實上，珠姐真係好識做，好似警隊員佐級協會噚日慶祝29周年會慶，身兼協會嘅創會會長譚惠珠致辭時，就出盡力擦警察鞋，話舊年12月17日晚韓農喺世貿會議同警察爆發衝突時，自己成晚冇瞓，一路睇住電視直播，見到班警察只係得支胡椒噴霧，就要同班識得打爛鐵欄拎鐵枝做武器嘅韓農肉搏（佢梗係唔記得差佬有用催淚彈同布袋彈），晨早清場過後，仲有唔少警察拎住現金走去7-11掃麵包畀示威者食。珠姐話香港警察係智勇兼備嘅威武之師，又話佢哋係05年香港風雲人物，如果香港有TIME，一定會上封面喎。如果本TIME係珠姐做老闆嘅話，都唔係話冇可能嘅。