每年台慶頒獎禮爭持最激烈的，總是最佳女主角獎項，今年挾《鳳凰四重奏》和《火舞黃沙》兩劇出擊的大熱佘詩曼，日前接受本報專訪，連續輸了七年的她揚言：「信心一定有，我會投自己一票。」阿佘細評三大勁敵時，指「肥田」胡杏兒只是肥得可愛，「Hilda姐」鄧萃雯演技好，但她最怕的卻是「焦玉」蔡少芬。
無綫下月10日舉行的台慶節目《萬千星輝頒獎典禮2006》已如箭在弦，競逐最佳女主角獎的四位大熱花旦包括《鳳凰四重奏》及《火舞黃沙》的佘詩曼、《肥田囍事》的胡杏兒、《女人唔易做》的鄧萃雯和《火》劇另一女角蔡少芬，四人各具實力，旗鼓相當，但若論牌面，似乎是阿佘和杏兒之爭，近日有關兩女的爭獎傳聞更傳得沸沸騰騰。
信心十足
「數字嘅嘢好難估」
阿佘日前接受本報專訪時，提到台慶女主角獎心水，阿佘細閱最佳女主角及我最喜愛的電視女角色入圍名單後，她說：「最佳女主角我會揀雯女（鄧萃雯）同Ada（蔡少芬）。雯女演技好，個角色好啱佢做；Ada首先估唔到佢咁後生可以扮我奶奶，覺得佢係壓到場，尤其係佢一輪嘴鬧我時，我都驚佢㗎。」
阿佘續說：「我最喜愛的電視女角色我會揀杏兒，雖然未睇過《肥田》，畀唔到乜嘢意見，但佢個造型好可愛，肥得好可愛。我都會投自己一票，點都要有信心，希望自己可以攞到一個獎。我每年都有信心，但有幾大信心同係咪攞到獎唔成正比，只可以話信心一定有。參加田徑比賽跑100米，可以講到有幾多成把握，平時靠練跑、過往成績可以評估，評演技唔同，演戲係藝術，藝術係見仁見智，問10個觀眾有5個鍾意你，5個唔鍾意你，鍾意你嗰5個可能冇投票，只係鍾意，咁點呢？數字嘅嘢好難估。」
輸足七年
「唔得第二年再嚟」
阿佘97年奪得港姐季軍後入行，自99年開始，年年有份角逐最佳女主角，但次次有得睇冇得攞，輸足7年的她卻輕鬆地說：「唔得咪第二年再嚟過，人哋得一定有人哋嘅原因。」不過她坦承曾為某年落敗而感到極度失意，她說：「邊年唔講啦，有年呼聲高嘅，民意又OK，自己都鍾意個角色，但最終都係輸咗。實有贏同輸嘅，付出努力唔只你一個，每個人都覺得自己比人哋付出多10倍努力，所以至會覺得失望，可能人哋付出真係比你多。宣布賽果嗰一刻，個人仲好緊張，要撐到最後一分鐘，唔係啲人又話你冇風度，又話乜又話物。」那年事後有否落淚？她說：「你估吓，我唔會答你。今年我係平常心，盡咗力就算。」
依據阿佘所言，估計她指的應為03年台慶，當時她憑《西關大少》成超級大熱，但最終張可頤憑《九五至尊》以半冷姿態奪女主角獎項。
冷對是非
「內功深厚頂晒啦」
每年頒獎禮踏入倒數期，例有報道指阿佘出陰招攞獎，她卻說：「冇咁得閒呀，內功深厚，全部頂晒啦。我唔會選擇還擊，亦都好開心，每年臨近台慶成為佢哋（雜誌）嘅箭靶、焦點，令佢哋銷量提高，冇利用價值嘅話，佢哋都唔會做，唔係熱門亦唔會寫，咁我自己唔係咪得囉，熟識我嘅人都知唔係，你寫我唔嬲㗎啦，銀行會少咗10萬蚊我就嬲。我哋現實生活唔係八卦書寫成咁，我哋好攰㗎，做嘢時間好長，唔得閒成日搞是非。」
採訪：朱倬誼
攝影：陳慧安
服裝：SistyrMoon
場地：CClub
