港股期指結算日峯迴路轉，恒指先創新高後低收，結算日加埋巨無霸銀行工行（1398）掛牌，大戶又點會唔上下其手，一於學我國軍事專家孫子教落嘅「亂而取之」。
朝早個市創咗新高後都企得好穩，事後證明係假象，結算日上晝大戶例牌托住或㩒住個市計平均價，所以睇恒指好多時都會俾大戶呃咗，要搵蛛絲馬迹，就要留意下月期指，不過，昨日上晝期指冇太明顯嘅造淡迹象，反而如有留意國企股走勢，尤其係最大隻最好炒嗰幾隻，就會發覺有啲唔妥，個市上晝造好，冇乜異樣，但係嗰啲股份就已經好大成交，同埋陰吓陰吓咁跌，晏晝淡友總攻擊，多得中移動（941）做中流砥柱，個市嘅跌幅先至冇擴闊。
咁個市跟住會點？會唔會已經見頂？睇嚟仲係言之尚早，個市升咗咁耐，班大戶用隻工行上市做掩護殺吓啲短線好倉，再重新部署，好正常，未平倉合約總數去到前日仲有16萬張，個大勢係由好友主導，邊度會咁快玩完，如果長假期外圍股市大幅造好，隨時會挾番上去。
恒指C輪2407：如果長假期美股冇乜大變化，港股下個禮拜復市有機會下試18130至18230，呢個支持區應該守得穩，個市掉頭升，有機會突破18400關，再推向18800，可以候低收集恒指C輪2407，昨日收24.4仙，槓桿率16.7倍（有效10.9倍），恒指見18800，隻輪應該會喺31仙樓上，恒指跌穿18000止蝕。
俊樺