甄妮、許志安、胡杏兒、李克勤同黃耀明等噚日齊集將軍澳電視廣播城，為今晚舉行嘅《童心同行愛之夜》進行開廠拜神，一眾歌手及藝員誠心上香，祈求演出順利。
王馨平唔捧場
首次嚟到新電視城嘅甄妮以一身超低胸打扮出現，搶盡風頭，令唔少同性既羨慕又妒忌，點知佢自爆最近縮胸成功，仲話好開心㖭！
甄妮話：「我一向都唔鍾意自己胸大，最近搵人按摩減胸，由原本嘅34F減到𠵱家嘅34C、D，Melody（甄妮的女兒）都遺傳咗我嘅大胸，佢都唔係咁鍾意。」
早前名模樂基兒走咗去隆胸，點知因為個胸太大，搞到腰痠背痛，被迫「拆彈」，問甄妮會唔會效法樂基兒？佢話：「我自己唔鍾意，但都會接受，唔可以話唔鍾意就cut咗去，最多都係做吓運動、或者係按摩令佢firm啲。不過如果我個女話想整，我會支持佢。」
至於甄妮個徒弟王馨平噚日同鄧光榮、蘇志威（阿細）去惠陽棕櫚島主持「周大福高爾夫邀請賽」開球儀式。阿細會同老婆及囡囡留宿度假，結果俾鄧光榮取笑，阿細即刻話：「我嚟嚟去去得一個女陪，大哥你就……。」
當年王馨平同甄妮因合約問題鬧翻，馮仁昭問王馨平會唔會睇甄妮個演唱會？佢話：「唔知佢幾時開，好似年年都開，我哋冇聯絡，但佢係我好尊敬嘅長輩。」
