美女廚房，着火先講。網民「萬年老妖」日前到男友家中玩溫馨「煮飯仔」，嬌滴滴的少女平日十指不沾陽春水，一入廚房便闖禍，竟把放在煮食爐旁的報紙燒着，「好在最後都無成間屋燒咗，只係黑咗小小，但係畀佢阿媽知道咗，嬲咗我，仲話以後唔畀我再去佢家。點算，畀咗個壞印象佢阿媽同佢，嗚……真係想喊，早知等佢餓死我都唔煮嘢畀佢食啦！」
萬年老妖稱當時火光熊熊，以為要與男友葬身火海，她見勢色不對，在撲滅火頭後便走人，未來奶奶返家後見廚房立立亂甚為勞氣，事隔一天伯母仍未嬲完，一邊執手尾一邊向她男友埋怨，「呢啲女仔邊娶得過呀！」
禁入家門 求教補鑊
慘被伯母下禁制令不准她再登門，萬年老妖向網友求教如何補鑊，她說自己烹飪技術不俗，間中會在男友家中整曲奇餅及咖喱飯，只有一次食物未熟透「食到佢肚屙咗兩、三日。」雖然伯母氣在心頭，萬年老妖的媽咪則大呼好彩，「佢仲話燒佢（男友）屋企好過燒自己屋企喎。」
網友提議萬年老妖上門謝罪「畀人省一次」，好讓伯母「順番條氣」；也有人稱她可乘機請教伯母廚藝，既可增進感情又可令老人家自覺有面子，日後便入門有望。萬年老妖最後報告，稱已約伯母明天飲茶賠罪。