有人話眼淚係女人最厲害嘅武器，古有孟姜女哭崩長城，今有陳婉嫻淚灑議事堂。不過嫻姐嘅眼淚就冇孟姜女咁有效，原本以為佢咁樣一喊，廣大打工仔應該聞者心酸，唔記得晒工聯會喺最低工資問題上左搖右擺。點知噚日兩大電台嘅烽煙節目，聽眾差不多一面倒大鬧工聯會轉軚，有人仲好有心思咁，摷返嫻姐過往義正辭嚴之後又轉軚嘅往績。
工聯會話政府應承一年後檢討工資保障運動，已經係一大進步，點知《千禧年代》聽眾張先生踢爆話係人都知一年檢討只係假嘢，咁都收貨，仲唔算係出賣工人利益？佢仲翻嫻姐舊賬，話佢當年明明話支持炒老董愛將路祥安，到立法會要佢投票就轉軚。
聽眾黎小姐仲抵死，佢話陳婉嫻唔係出賣工人利益，而係「又一次」出賣，因為回歸後佢否決咗集體談判權。陳先生形容工聯三子係工人「無間道」，表面話係為工人利益，撐到好盡，事後就軟幫政府，睇吓廢除集體談判權、23條立法咁，全部撐政府，喺啲大是大非事件現晒形。
李卓人睇通左派籠嘢
至於商台《在晴朗的一天出發》，班聽眾就更加唔客氣。姚生話陳婉嫻根本同工聯會會長、行會成員鄭耀棠扯貓尾，又話嫻姐做咗咁耐左派議員，無理由蠢成咁，唔知最終要聽阿爺話歸邊撐政府。
打工仔群情洶湧，嫻姐嘅眼淚今趟似乎白流，八方噚日打鑼咁搵佢想問問佢仲有冇咁激心，點知喺立法會一就施政報告致謝動議投票後，嫻姐極速快閃消失，之後call極都唔覆。工聯三子之一嘅鄺志堅頂硬上話，都尊重市民嘅睇法喎。
工會中人分析，今鑊工聯會玩大咗，主要係錯估形勢，以為最低工資立法問題，大家鬧吓就算，冇預到對家李卓人睇通晒左派講就天下無敵，最後就無能為力籠嘢，明提修訂動議譴責施政報告，暗中搵埋人去司法覆核《行業委員會條例》，就係等你工聯會一縮沙，保皇派真身即時現形。