蜆壳電器（081）日前復牌，宣布增持一間持有光大房產的Jodrell，令集團持有光大房產股權，由56%增至70%，消息刺激蜆壳一度升4%，收市卻倒跌1.1%。
蜆壳規模唔細，喺北京、廣州、上海、桂林、合肥同遠至呼和浩特都持有地皮，總計土儲達到300萬平方米，拍得住唔少中型地產商，據講佢其中一個樓盤光大榕岸如全數賣出，都可以套現逾10億銀，而公司市值只不過係13億銀。又係一間折讓大到你唔信之上市公司，但係大折讓總有理由，歐陽風覺得係同佢業務太散有關。
打開年報，發現蜆壳地產業務除光大房產，又持有廣州中信廣場15%用作收租，而廣州另外一項業務，係出租的士，持有775個車牌。喺深圳，又有一個高科技無塵廠房純收租。講咗咁多，都唔係公司本業，蜆壳其實係做電器起家，包括風扇同埋吸塵機，早幾年間公司唔知係咪想搞縱向生產，廣東有間公司係做電纜，而於順德則有間公司搞不銹鋼焊管，另有一間公司做鐳射Scanner，同本業都冇太大關係。
集團仲有個高科技部門，搞晶片同埋刀片式超級電腦，年報話呢部蜆壳星盈超級電腦每秒運算速度達4萬億次，認真巴閉。搞咁多花臣，中期業績卻倒退47%，所以瓣數多唔一定係好事，等佢交出好成績至諗未遲。
歐陽風