最近唔少大行出報告睇好越南投資前景，其中美林撰寫嘅研究報告，形容越南是亞洲最後一個尚未開發之市場，給予10年買入評級，呢份報告，早排名家MichaelPreiss都有提過，越南短期內有好多重大利好消息，包括年底前加入WTO，以及下月舉行亞太經合會議。除此之外，滙證同瑞信等大行都先後出報告睇好越南投資前景。
大行唱得咁好，原因係呢塊係各大行必爭之肥肉，未來幾年國營銀行、電訊同埋基建公司排住隊上市，瑞信估計，越南股市總市值，將會由目前唔夠30億美元，暴增2010年前至少140億美元。兩個零月前美林成功獲得在越南股市直接買賣股票所需嘅「交易代碼」，其他大行眼紅到飛起，仲唔爭住唱好？不過越南股市市值咁細，點容得下咁多外資湧入？因此，𠵱家越南上市公司全部變成稀有珍品，P/B平均3至7倍。
落實進軍地產業務
與其亂咁搶，倒不如買剛剛宣布投資越南地產嘅陸氏實業（366），公司喺越南搞水泥廠已經好多年，為配合經濟起飛正計劃倍增產能，淨計水泥生意已經係一個賣點。
至於剛落實喺胡志明市嘅商住合營項目佔70%權益，土地面積2.2萬平方米，起寫字樓、酒店同住宅建築面積共11.5萬平方米。以投資額2000萬美金，未計建築費前每平方米成本只係174美金，但同區市價賣緊1500美金，計埋日後地產升值，條數認真和味。可定3元止蝕，長線持有。
歐陽風