前晚，花旗國央行議息，一如全世界所料，唔加息。全世界對今次議息睇法一致，不過對未來利率走勢預測，就百花齊放。首先，有牛仔總統啦啦隊話，經濟「打不死」，所以可能有通脹壓力，繼而會見到聯儲局加息。又有啲好似孫柏文咁嘅財經口水佬，話因花旗國樓市繼續爆煲，不久將來會開始減息。正當加減雙方議論紛紛，個個講到有紋有路嘅時候，就有我哋特區央行行長任志剛出嚟話，有排都會見到聯儲局定息不變。
其實，花旗國利息走勢預測嘅分歧咁大，都係因為完全冇人知道究竟佢哋經濟會點，比起以前格林斯潘嘅聯儲局，分別好大。分別就係以前個個覺得格林斯潘乜都知，對未來經濟走勢嘅估計胸有成竹，只係你問佢「點睇」嘅時候，佢就好似嗰班讀好多書嘅前宗主國人咁，用啲好鬼深又陰濕嘅英文答你，搞到講咗等於冇講。雖然，格林斯潘以前次次對經濟嘅預測都係冇嘢講，不過，畀人印象好似佢乜都知，只不過你自己聽唔明。所以以前，就算全世界都冇人知花旗國經濟會點，最起碼都仲有格林斯潘知。
今時今日嘅聯儲局，份份聲明都好易明，不過，就係因為大家都卒之明白聯儲局真正嘅思路，先覺悟連聯儲局本身都完全唔知道花旗國經濟會點。情況有如喺電影「綠野仙蹤」裏面一樣，冇咗「陰濕英文」簾幕遮掩嘅術士，原來完全「冇料到」。
不過，噚日應承過大家，分析聯儲局份聲明，所以今日就為大家睇睇。首先，聯儲局形容經濟前景嘅用詞，比起8月同9月會議嘅聲明，愈潑愈多冷水。
8月：「強勁經濟增長開始放慢。」
9月：「經濟增長放慢持續。」
10月：「經濟增長放慢持續，未來經濟增長速度會好慢。」
聯儲局話經濟表現放慢嘅原因亦有變。
8月：樓市差、油價高、加息見效。
9月：樓市差
10月：樓市差
所以肯定樓市走勢會主宰聯儲局加減息決定，不過花旗國樓市就好似番鬼佬話齋slowspeedtrainwreck，大家都知道會撞火車，就算大力煞車將火車速度盡量減慢，大家都知道煞唔切車，一定會撞。問題係會死幾多人？同埋呢班火車啲有毒按揭借貸，會否洩漏出來荼毒國際金融環境？大家都係繼續睇落去，睇吓點收科。
最後，熱烈祝賀工行上市，ICBC已經成為ICanBuyChina，全球熱錢會繼續追捧依靠大陸繼續經濟增長嘅祖國巨型公司，恒指繼續靠中移動上。今日，成交量、成交宗數全部都有機會破98年紀錄，求神拜佛港交所部電腦頂得順，如果學日本東京早排頂唔順Hang機，又會有大批人出來要道歉、不過唔辭職。哈、哈！