ABC，不僅僅是三個英文字母如此簡單，曾經是香港一間著名俄式西餐廳的名字，我們這一代感陌生，於是問外婆，她即時記起︰「係咪喺旺角有好多分店，門口有西餅麵包賣嗰間呀！」原來上一輩對ABC仍念念不忘。
第二代掌門人解先生自己都話︰「我阿爸嗰時同十幾個同鄉夾錢開舖，之後生意好好，喺彌敦道、太子道、洗衣街，連西貢都有分店，通常係餐廳連餅屋。」那時候，解先生已在店中幫忙，麵包西餅樣樣識整，而全人手製作的山東月餅每年都有人排長龍嚟買，非常搶手。
自七十年代ABC全線結業，因對ABC的情意結，所以就在中環結志街重新開設賣麵包西餅的ABC餅屋，外表上跟一般麵包店無分別，但解先生說︰「我哋每年都會做山東月餅，不過唔係好多人知道，係熟客同鄉里先會幫襯。」解先生現在偷得浮生，每天都看舖，不像以前般營營役役。聽講結志街將會重建，咁咪又要搵地方搬囉？「若果重建，我都60幾歲人，到時就索性唔做喇！」
記者︰方綺君
攝影︰黃子偉
山東月餅
月餅用棗泥做餡料，咬入口外皮結實脆口，還有豆沙味道選擇，是解先生親手製作，有不少山東鄉里每年都特地來幫襯。
鳥結糖$45（大）$18（小）
新鮮出爐的鳥結糖軟腍腍好香滑，師傅話︰「如果放耐啲，等花生味滲入糖中間仲好食。」
西包$5.5（大）$2.5（小）
山東近俄羅斯，所以俄羅斯人常食的包在山東都有得食，樣子白白淨無特別，味道鹹鹹哋，問解先生個包叫乜名？「無名㗎，叫西包啦！」
ABC餅屋（25440301）
地址︰中環結志街1號地下