歐洲主要聯賽已過了約五分一個球季，坊間球迷近期多談論買里昂及巴勒莫如何長賭長勝，又或者追韋斯咸輸到氣咳。個人認為，相信足球比賽盤路有強弱嘅信徒，何懼追球隊反底，人腳唔差嘅韋斯咸呢輪8場全敗嘅大跌浪，仲會伸延幾耐？
個人喜追波唔追馬，更加唔會逢谷草長買所謂黃金1檔（剛戰8隻1檔馬全買WP仲要輸錢），排檔唔好，賠率每每好分，好些馬匹更愈輸愈熱；所以賭馬應持一個更冒險嘅精神，換取更大回報。只要注碼運用得宜，一個賽日能命中一、兩場，收穫已相當不錯。
相反球賽目前仍只屬季初階段，「毒藥」球隊未必一沉不起，「毒藥之王」韋斯咸今周主場對布力般，早飛只是平手盤，賠率已相當吸引，先買一注單W；之後會對阿仙奴（主）及米堡（客），一於追佢喺呢3場之內「反底」。
英國遊逃離馬會魔掌
剛喺周中推介聯賽盃捧下風球隊李斯特城同克魯，希望大家有所斬獲；始終呢類騎呢盃賽用逆思考方法投注更合。曼聯出半隊𡃁仔踢，馬會單W賣到1.3倍，要知道再早一日阿仙奴贏西布朗嘅賠率亦只得1.7倍，比海外莊家派彩少約10-15%，引證我指出大莊能將風險減到最低之餘，亦有大把機會將熱門客注碼一網打盡。無辦法，鬼叫係人都知香港球迷最鍾意賭英超名牌。
小弟嚟緊將會到英國一遊，睇番幾場英超比賽之餘，自不免會走訪總有一間喺左近嘅博彩公司，有得格吓價買波，好過喺香港畀馬會㩒住搶！文：蘋果波神