等到頸都長，今期投資特攻隊終於輪到我畢傑擔大旗，希望繼上周推介曼聯、利物浦同愛華頓連中3口波膽後，為本欄帶嚟旺氣。言歸正傳，今次誠意推薦新敗嘅英冠1哥卡廸夫城主場可挫打比郡；冷選就揀英超屈福特主場迎戰熱刺不敗。文：畢傑
卡廸夫城係間相當有野心嘅球會，嚟緊08年尾就會搬去可容納30,000人嘅新球場，擺明有信心升上英超先會咁做。最近又傳佢哋想喺明年1月斟修安聯星級前鋒伊斯活特加盟，以卡廸夫城嘅班底，真係似足上屆英冠盤王雷丁咁款。
講開盤王，卡廸夫城今季聯賽逢主場要讓波嘅亞洲盤全部贏晒，盤路咁強幾大再追。筆者唔係馬後炮，上場佢哋以5連勝姿態作客近期幾頹嘅諾域治，莊家竟然開個平手盤2.08倍高水你買，呢個盤真係好鬼，於是決定避開唔掂，而戰友蘋果波神就醒到買番諾域治贏，結果大家都知係咩事（諾域治贏1:0）。
未曾連續兩場輸盤
不過球迷呢層可以放心，卡廸夫城貴為英冠盤王，當然有佢嘅賣點；原來佢哋今季所有賽事計起，從未試過連續兩場輸盤害捧場客，上場平手啱啱輸完，呢場對打比郡係入貨時候。軍情方面，卡廸夫城今場有已入7球嘅前鋒祖柏停賽復出，攻力即刻放心晒，而後衞基利亞基拔因為上場領紅要坐波監。
至於排第11位嘅打比郡攻力都見得吓人，有阿仙奴借將前鋒盧普利攻堅，但呢個意大利仔話領隊比利戴維斯作客好鬼鍾意守，仲叫佢轉打中場幫波，咁嘥料點攻入卡廸夫城？條防線就仲得人驚，早排作客打少1個嘅普利茅夫都失3球；今場仲要有後衞戴倫摩亞停賽、前鋒柏治蘇里度及後衞馬琴等5名主力受傷缺陣，認真牙煙。
冷選屈福特唔怕「刺」
冷選不妨昅實屈福特，得番佢哋仲未喺英超「開齋」，爭勝心大過熱刺。睇番熱刺喺歐協盃就威威，聯賽唔係靠12碼就係對手烏龍入波，贏韋斯咸都係人哋喺谷底有關，齋用攻力對撼，屈福特分分鐘仲勁過熱刺，熱捧「主勝」冷敲主W。
投資特攻隊金句
卡廸夫城今季主場盤路好勁之餘，亦未試過連續兩場亞洲盤輸盤，趁住打比郡作客龜縮，又有唔少傷兵，博主隊贏波正路。