雖然話地產代理呢行，近排因為物業交易製造咗唔少風風雨雨，但搵食終歸最緊要，難得新盤市場突然轉旺，數盤齊推，成班經紀當堂生猛番晒。
幾個盤中，經紀對以平價貨為賣點的屯門豫豐花園最為雀躍。皆因過去兩年，發展商主力賣中價或大碼貨，欠缺主流上車盤，市場等百零萬嘅細價新盤已好耐，所以代理行今次都幾乎傾盡全力，促銷呢個新界盤。
噚日恒基罕有地租用屯門戲院舉行樓盤誓師大會，由早場十點幾包租到下晝兩點，除兩大集團中原同美聯各派成千人外，連細行祥益、盈富物業同世紀21都派人參加。
美聯執行董事陳坤興仲話，為谷代理入票，整咗個入票大獎，頭3間入票最多分行，就送魚翅鮑魚宴，入票最多員工仲有1000蚊現金獎。呢個平價上車盤都送貴價鮑魚宴，相信佢哋都諗住佣金好和味。