05年5月當我拿下「最佳體育精神獎」的時候，大家知道我當時的心情是怎樣的嗎？當面對各方傳媒訪問，不斷回答「我很高興」這標準答案時，其實心底裏真的很難受。不知不覺原來自己在NBA已經度過了11個年頭，回想起94年出道之始，人人將我捧到天咁高，誰不知4次足踝手術，就摧毀咗我嘅一切……
一路以來我都知唔少球迷好支持我，就算係受傷期間，佢哋都不離不棄；可惜每次復出之後無奈又再長唞。當年帶傷嚟到魔術，我真係以為自己可以重獲新生，可惜命運弄人，最後又係一次接一次咁受傷，𠵱家甚至連隻腳踝都轉唔到；以前喺網上叫我唔好放棄，話等我重返球壇嘅球迷，𠵱家都逐一遠離我，有啲仲叫我快啲收山，唔好阻住地球轉。
不怪球迷捨己而去
睇完呢啲留言，我一啲都冇怪過班球迷。換轉係我，一次又一次嘅失望都令到我意興闌珊，甚至諗過放棄籃球。我都曾經試過怨天尤人，心裏反覆咁問：「點解上天賜予我出色嘅籃球天份，我又咁努力，偏偏命運會咁差；點解，點解……」
不過自從我經過幾次嘅重創，甚至試過同「死神」擦身而過之後，我終於明白到生命誠可貴，更加珍惜𠵱家擁有的一切；只要一日有望重返球壇，我都會等，用永不放棄嘅精神繼續養傷。
我手踭上面一條延伸到三頭肌嘅疤痕，係我永不磨滅嘅傷痛。嗰一晚係03年嘅春天，當時我同太太Tamia剛進入夢鄉，身體突然變得冰冷，而且不斷流冷汗，任Tamia點叫我都唔醒。原來我手術嘅傷口受病毒感染，最後醫生用咗呢條疤痕上原有嘅皮膚同埋動脈，用嚟修補我足踝受到感染嘅傷口，先救番我一命。
逃出鬼門關 更愛錫家人
喺我以為自已會長眠不起的一刻，好幸運執番條命；因為呢次幾乎成真嘅「生離死別」，令我對人生有另一層嘅領悟。相比起總冠軍指環，家人實在重要得多，只要無愧天地，喺佢哋鼓勵下，終有一日我會再次企喺球場上，盡我所能比賽。
文：賴恩
電郵：[email protected]
今日主角
姓名：格蘭希爾
球隊：魔術 位置：前鋒
年齡：34歲 年資：11年
特徵：曾經被視為最接近「籃球之神」佐敦的球員，進攻、防守無一不精，堪稱全能的技術型球員，可惜近年傷患纏身，因此被冠以「玻璃人」的稱號。