發展商呢頭劈價清貨，嗰頭又唱好個市高價開新盤，搞到唔少用畢生積蓄買樓嘅小業主一肚氣，成日鬧啲發展商淨係識賺錢，無良心又無社會責任。班發展商有理無理，繼續賺錢要緊，唔係點同班股東交代？不過，又唔係個個發展商都一味無良心，久唔久都會做吓慈善，宣揚吓愛心。
好似太古地產嘅義工隊「愛心大使」，轉眼已經成立咗5年，𠵱家有成500個成員。為咗慶祝5周年，佢哋會響11月4號聯同幾個社會服務機構，搞番個「愛心學堂」活動，希望將「社會共融」嘅服務理念宣揚開去。活動包括義賣家具、大抽獎、魔術表演等等，仲請埋主席簡基富做主禮嘉賓。
太古話企業做慈善唔應該只係俾錢贊助活動，最好係落手落腳去做，咁就可以更加了解社會人士嘅需要啦。
各位地產商記住喇，唔係賺咗大錢，係咁意捐番少少出嚟就當做咗好事，出完錢再出埋力至算無得彈！