打工最緊要係咩？唔係做得捱得，無論係人係鬼，最緊要八字生得正，搵到個好老細，仲要係好到無論去到天涯海角，都會射住你！唔信？睇完8號仔個HR頭頭彭德雅（PeterAllen）呢個人辦，閣下除咗會睇睇自己有冇咁好命水之外，應該仲會重新評估自己個老細似唔似小小超咁！
話說正當8號仔賣盤未有進展之際，二少自己檔盈科拓展（即係賣8號仔個單位）宣布，將彭彭由CFO升做MD，8號仔內部噚日亦出咗通告，話彭彭由11月1日起，出任8號仔嘅CorporateDevelopment（企業發展）董事，講到明佢直接向主席（即係二少）報告，同埋花更多時間響香港以外（尤其係東南亞）……咁即係做乜？照字面理解咪係負責業務發展囉。
仲有，根據通告顯示，佢仲係186間公司嘅董事（大部份係二少啲公司），所以，實際上兩個字講完──親信！
消息人士話，呢位親信之中嘅親信，同二少識咗好耐，咁計數佬出身嘅佢，有乜彪炳戰績？摷勻資料，只可以講係有兩點：一是當年二少響東瀛檔「啫喱糕」（後尾改咗名做8號仔Japan）就係由佢老哥睇檔，結果……賣咗；二是身為盈拓CFO嘅佢，響7月尾單賣盤刁仲係鬧哄哄之際，突然爆出話8號仔唔一定賣畀誠實小番薯，但當晚盈拓即刻出嚴正聲明否認……厲害！
去立法會解畫
至於8號仔上下對彭彭有乜評價？太古坊小探子話，鎖你，由於正常workinghour好難見到佢，甚至連副主席「着數」都搵佢唔到，所以冇咩評價……話明係親信，兼夾自己本身就係HR頭頭，唔通同自己請假咁無聊咩。
講開又講，立法會下個月廿幾號就會開會傾電盈呢單刁，咁二少到時究竟使唔使現身解畫呢？參照領匯嘅經驗，就算涉及廣大市民利益，主席鄭明訓都唔使出席，照計賣嘢呢啲私人嘢，二少係唔需要到嘅，反而彭彭作為盈拓重臣應該一力承擔……除非二少想畀中環白領一睹佢嘅風采，否則華華都諗唔到佢有乜理由亮相立會！