華華噚日睇睇吓聯交所嘅上市公司權益披露發現新大陸,中富航空新話事人蒙建強最近用931萬元,喺場外買咗鼎洋投資(905)呢隻殼55.39%股權,由於超過三成,將要提出全面收購,即係要拎多幾百萬出嚟。
鼎洋停牌前收報7.4仙,市值1776萬元,蒙建強以每股7仙,兩千萬唔使就買起呢隻殼,好鬼抵。
蒙建強同海南航空關係密切,海南航空阿媽新華航空今年買入中富航空45%後,創辦人即中富控股老闆葉長青,再將自己55%股權賣埋畀蒙建強。
之前市場傳緊新華航空會嚟香港上市,𠵱家蒙建強走去買隻殼,華華估計好有機會將中富或者新華借殼上市。但由於殼股需要兩年過冷河,期間不能改變業務,鼎洋𠵱家係投資控股,料注資仲有排等。