美國唔加息，大家都預咗，會後嘅聲明喺評論通脹方面嘅語氣「溫和」咗，「溫和」兩個字係傳媒講嘅，當然意見係來自美股嗰邊嘅分析員，「溫和」係咪真係伯南克嘅意思，冇咁容易知，但係呢個用詞嘅意義對股市係「正面」嘅，美股應該可以高企。
日股升破咗16800，如果企得穩喺呢個位樓上，再破埋17000關，咁樣圖表上嘅目標就係19000。美股向來係港股嘅指標，日股就係港股即市炒作嘅藉口，如果日股真係炒上19000，大家都會諗到對港股有乜嘢影響。
昨日港股一啲都唔失禮，創咗收市新高，升成200點，今日工行（1398）掛牌同埋期指結算，淡友成個勢輸晒，睇怕都好難負隅頑抗，一係轉倉，一係止蝕，恒指若升破18400，有機會扯上18800先會出現技術調整，睇啲成交變化，其實好多人仲係唔敢入市，不過，當個市升近19000現調整，相信會多番好多專家叫大家趁低吸納。技術上港股突破18400後，要睇20000至22000，個市推高，中移動（941）功不可沒，呢幾日叫大家可買啲中移動C輪，𠵱家中移動嘅技術走勢好到不得了，買盤又夠狠，啲中移動C輪仲係好吸引。
中移動C輪3496：月中介紹隻3496嘅時候，個價係39仙，昨日已升到62仙收市，槓桿率10.1倍（有效6.6倍），仲有124日壽命，溢價5.8%，唔貴，對沖值0.65，引伸波幅30.9%，莊家同炒家佔嘅成交比例好健康，正股升，3496會跟得好貼，中移動昨日報收62.60元，會上試65元，破位睇68元，升上呢兩個價，3496應會逼近78仙同埋1元，正股跌穿61元止蝕。
俊 樺