10月份唔單止冇股災，大市仲逼近歷史新高，恒指噚日大升195點，收18353，最高18378，同2000年歷史新高18398，只相差20點。至於期指，噚日更大升269點，收18418，同2000年歷史新高18470比較，只相差52點。
不過，「登登登櫈」，港股創出新高，實在已成功咗一半，恒指歷史收市高位係18301.69，噚日已過咗，只要升多幾十點，又成功埋另一半，歷史時刻幾時會出現？
大市雖然新高，但散戶依然好審慎，既然未有瘋狂，大市點會「滅亡」。個人認為大市好有機會創出新高，甚至去到18500至18700，才會出現調整，但唔會大跌，後市仍係向好。
大市氣氛雖唔算太熱烈（成交只得338億元），但有唔少股仔都有勢，一係唔郁，一郁就大升十幾二十個巴仙，短炒家大有用武之地。噚日成交有異動嘅股票中，中信21世紀（241）就值得留意。
MACD現入貨訊號
中信21成交增到1364萬股，係7月中以來高紀錄，股價升1仙，收0.96元，近日已升破10日線（0.917元）、20日線（0.919元）同50日線（0.938元），MACD亦現入貨訊號，一衝破下降軌的0.98元阻力，確認中期調整完成，開展新上升浪，短期上升目標指向1.20元。
中信21推出嘅質檢網，業務發展迅速，收入模式係按客戶規模及所需服務而定，收取年費介乎1萬至200萬元，現時已入網的大企業和品牌有青島啤酒（168）、海爾、貴州茅台、五糧液和古越龍山等，預計到06年底，入網的企業可達50萬家。
06年度（3月年結），集團營業額4.03億元，升62%，獲利915萬元（05年度虧損175萬元）。質檢網今年4月起全面開展業務，預期07年度盈利將大升，中期業績好快宣布，對股價應會有刺激。
郭兆誠