不少本地名人明星均是瑪麗嘉兒的fans，今次她臨時取消個唱，即時引起圈中人關注，紛紛表示可惜。
鄭融：我好失望，張飛係張敬軒畀我。佢要唔嚟乜嘢理由都得㗎，崩咗隻指甲都係理由。我睇過佢以前嘅特輯，佢崩隻指甲都好緊張，要即刻搵人修甲，所以喺佢身上乜都可以發生。
莫文蔚：聽講仲話搭緊台，不過我因為要飛上海，所以冇買飛睇，我讀大學時好鍾意聽佢啲歌。
趙世曾：我冇買飛睇，喺拉斯維加斯一邊食一邊睇都試過啦，今次最貴張飛成5,000蚊（編按：內部認購門票最高票價為$4,888），添馬艦音響又咁差，一啲都唔值。
榮文蔚：我老公買晒飛㗎啦，佢好鍾意聽MariahCarey嘅，嗰晚仲會同埋Pansy（何超瓊）去睇㖭，𠵱家話取消，都冇辦法啦。
陳苑淇：我兩個月前一聽到佢開演唱會，已經周圍撲飛，終於撲到兩張，每張都成千蚊，𠵱家取消覺得好可惜，好揼心。