老友記崔少明在《信報》專欄講GiveMe工行orGiveMe綜援（十月二十三日）十分抵死惹笑，工行上市，吸引近九十八萬人入紙申請，呢班人相信亦大多數係合格選民，故此在香港，阻人發達嘅行為，好易妨礙公職競選。曾特首據說會破例出席工行上市儀式，希望到時工行股票升得好好睇睇啦，假如萬一不幸下跌嘅話，曾特首民望就會受牽連咯。
申請唔到工行，唔使攞綜援啩？崔博士講笑話啫。公關大姐大就唔係講笑話。放工時分佢好彩在皇后大道中截到一架的士，大姐大係咁意講咗一句：「𠵱家比較難搵到的士。」司機立即反應好大：「有幾難呀，中環在放工時間，五點半到八點，中午食飯時間，搵車難少少啫，但嗰個時段，多數係中環去灣仔、銅鑼灣、上半山，全部塞車塞到死，我哋搵到幾多錢吖。有埋GST，我就去攞綜援㖭！」大姐大等佢一輪嘴講完，先至問：「你係司機，有收入，點可以攞綜援？」司機話：「容乜易噃，引入銷售稅之後，我揸車衝三個紅燈，就會罰到停牌，停牌就冇收入啦，我咪有資格申請綜援囉。人哋話，退休法官個個禮拜去陸羽飲茶，都涉嫌冒領綜援啦！」
大姐大係陸羽常客，一時之間駁司機唔倒。係就係嘅，陸羽一碟點心賣三十五元，一碗飯起碼六七十，真正攞綜援人士點負擔得起吖，大姐大只係奇怪司機點解對GST有咁大反應，於是同司機「理性討論」，香港如果愈來愈多人攞綜援，錢從哪裏來？司機話：「呢啲我唔識，要我凡係食飯入油買嘢都交稅，死人都反對。」
左丁山問大姐大：「如果你為推銷GST做公關顧問，計將安出？」大姐大話GST犯眾憎，確實考死公關專才，要好小心度橋至得。唔使度咯，曾淵滄教授在大公報（十月二十三日）發表文章講「政府處理銷售稅六招」，直情擺錢落唐司長嗰袋。不過睇真啲，呢六招未必止得咳，頂多苟延殘喘而已。