超人效應又再出現。話說加拿大赫斯基能源總裁劉錢崧日前到訪山西考察，獲得省長于幼軍會見，當地報章自然大事報道。話就話赫斯基物色投資機會，但報道李嘉誠計劃投資山西先係主菜，又話劉錢崧係受李嘉誠委託，專程去山西，就煤層氣嘅開發利用進行考察洽談。
點解咁講，報道話，原來今年7月，山西省來港招商，于幼軍同李嘉誠傾過偈，介紹咗山西嘅投資機會及投資環境，當時超人應承盡快搵人到山西考察，尋求發展機會。結果，繼和黃到山西投資房地產項目後，劉生又去考察煤氣層項目，充份顯示李超人對山西投資嘅濃厚興趣。
原來煤氣層開發利用，係山西未來幾年加快經濟發展及環境保護嘅重要舉措，政府會大力支持。唔怪之得佢哋咁落力sell啦。