不認不認還須認，前日AC米蘭又要靠中後場嘅贊古奴夫斯基入波，小勝基爾禾1:0；計吓數，呢球只係AC米蘭近9場嘅第6個入球，而期間前鋒未入過波，可以想像隊波踢得有幾「好」。所謂馬首是瞻，連班霸AC都踢得衰，意大利波可觀性何在？呢個應該係意甲入座率又跌嘅其中原因。
基拿甸奴最叻賴地硬
我話AC又靠贊古奴夫斯基入波，係因為呢個捷克國腳上個月對阿斯科利已經入過致勝球，佢嘅成功反映球隊鋒將有幾失敗。唔使講咩，噚日我哋先講過基拿甸奴改姓「賴」，話夾唔到恩沙基踢法所以無波入；好嘞，呢場對基爾禾，恩沙基被收起，基拿甸奴一樣無起色，下半場重試過對住空門高出。
講番早兩日《體育報》出嘅報告，指出自97至98年球季到𠵱家，意甲平均入座人數由3萬1千幾人暴跌到如今1萬9千幾人，唔到你唔驚。假波醜聞、球場暴力、祖雲達斯降班，加埋連傳統勁旅都失色，又難怪意甲賽趕客。意甲衰又唔代表意乙衰，祖記降落意乙後令呢個聯賽號召力大增，平均入座率同上季比升咗23.3%……；喂，祖記，嗱嗱臨升番班好喎。
意大利贏世界盃並未帶旺意甲聯，幾支強隊，甚至整個聯賽都要檢討。意乙有祖雲達斯同拿玻里等傳統強隊，我真係想睇佢哋多過巴勒莫憑問題十二碼贏墨西拿囉。