今年雙春兼閏月，華華都接咗三個紅色炸彈。廖創興銀行就乘勢推出「GiftCard」，即係好似做人情嘅禮券，加埋EPS嘅混合體，先入100至5800蚊落張卡度，送畀親友，對方就可以喺6至9個月內碌卡消費，即時扣數，就算喺國內外嘅朋友都唔怕兌唔到現金啦！
如果喺下年2月28日前申請，仲免收10蚊出卡費！不過，GiftCard用到冇錢就冇得增值，只可留個紀念。廖創興銀行常務董事劉惠民話，目標喺未來1年發1萬張。
雖然𠵱家信用卡競爭激烈，但屬於中型銀行嘅廖銀就已經定晒目標。佢哋目前發卡量逾10萬張，市佔率不足1%，希望出年佔多啲。𠵱家平均簽賬大約1000至2000蚊，劉生希望有兩位數增長。佢仲唱好今年經濟，話打工仔荷包腫脹，聖誕去旅行有望衝出亞洲，向美洲同歐洲進發，簽賬購物真係濕濕碎啦。