停售咗4年嘅居屋，將會喺明年初重售。呢批單位為數超過3600個，個別位處市區，屬居屋樓王，吸引唔少合資格嘅市民喺唔同嘅網站上留言。
盈盈262喺《親子王國》出咗個題目畀大家討論：「07年有居屋，你哋有無興趣？」
ngyanting2000即時回應：「我都有興趣，不過放得太耐唔知會唔會有問題？」
jk0925話：「Yes......梗係嚟緊居屋樓王牛池灣嘉峰臺，不過用夫婦名義去抽，機會好微，因為都渴咗咁耐市，但好似分幾期推出，到時抽唔到先至會考慮買私樓。」
佢又認為：「講到質素，真係見仁見智，始終都空置咗3年幾。我上網睇過，唔知點解有幾條水喉喺天花板，同埋水喉都開始生銹，到時唔知會唔會執過先至賣呢？我覺得2000零蚊呎自住都算ok，因為私樓未必買到。」
而喺《香港討論區》也有類似嘅題目。
赤道上的企鵝問：「個市差成咁，你地估吓政府會唔會將重售居屋計劃延遲呢？」
【格仔】回應：「再丟空嘅話，房委會無錢收之餘，重會白交管理費。」
麵包超人II都同意：「唔賣唔通留番嚟養老鼠咩，話晒居屋已起好多年。」
原來網民最關心嘅，唔係居屋重售時嘅定價，而係單位丟空咗咁耐，究竟𠵱家嘅質素會係點？
睇嚟房委會喺落實賣樓之前，真係要認真處理呢個問題，等班買家可以放心入市。