中資股近排輪流發功，唔少落後股都成為股民尋寶對象，上海集優（2345）係其中之一。隻股前日以大成交升3.7%後，噚日略有回吐，收報2.49元，跌4仙，走勢有啲飄忽，散戶有啲無所適從。
《Yahoo討論區》內，mika_lsm向其他網友呻：「隻嘢又落返去啦，都唔開車嘅，點睇呀？」
GreenHand建議佢：「唔跌穿$2.5，持有。跌穿先走人。」
monmonlai88就認為：「一定要有耐性……大戶要挾到我哋全部離場……失望再失望……先開車。」
thescott22對隻股仍有信心：「小弟都有2345，睇番呢排由9月起就有基金響低位收集，所以覺得跌穿$2.4的機會唔高。」
本身價值未反映
集優主要從事設計、製造及銷售葉片、軸承、刀具同電動機，同時提供有關機械零件及部件業嘅服務。隻股今年4月上市，冇幾耐就遇上姊妹公司上海電氣（2727）有管理層涉嫌違規被查事件，股價久沉不起。事實上，調查事件同公司本身管治無關，當事件淡化後，自可反映本身嘅價值。集團8月中公布截至6月止半年業績，純利1.47億元人民幣，急增119%，每股盈利由9分升至14.9分人民幣，預期PE12.7倍，唔算貴。
技術上，隻股自8月初跌至2.35元上市以來低位後，近呢兩個幾月持續喺2.4至2.65元之間橫行整固，前日升破保歷加通道時，成交股數增到接近19球，噚日回吐時成交縮至不足9球，係好現像。噚日BNP發表報告，重申「買入」評級，目標價2.8元，雖然唔算十分吸引，但現價勝在再跌空間唔大，跌穿2.4元可以止蝕，一旦突破2.8元阻力，下一目標起碼睇3蚊。
余文