老翻打擊正版、BT打擊老翻，格食格，睇落就好似一個生物圈循環，幾咁合情合理！不過，今日介紹呢部國產手機玩得仲狼死，外形既抄襲SONY手提遊戲機PSP，內涵卻來自紅白機年代嘅任天堂經典遊戲，如果唔係熟悉行情，仲以為SONY同任天堂兩大遊戲廠商破天荒搞合併㖭！雖然不得不佩服老翻創意，但內置紅白機模擬器，用家下載遊戲玩絕對屬侵權行為！
記者：陳國輝
攝影：楊錦文
ImageGirl：Chimpy
買返大陸做手信
查實國產手機唔係第一次「模仿」名牌產品，例如諾記N70、索愛P990i，以及三星一系列滑蓋機亦成為過「受害者」。雖然抄得似，但講到手感、系統穩定性、影相及聽歌質素等始終冇得比，正如Sales話齋「香港人睇唔上呢啲機㗎，佢哋只會拎返大陸送畀親戚朋友。」咁又係，香港人崇拜名牌，匿埋屋企睇老翻就唔怕啫，拎部手機出街逛又點同？
機身縮水外形九成似
講到最爆笑，就係將原本PSP嘅體積縮咗成半，令彩芒得番約2.2''闊，同正牌PSP嘅4.3"固然冇得鬥，打機都冇咁爽啦！最過份係雖然機身按鍵跟得好足，之不過佢將原版嘅PlayStation掣放到亂晒龍，例如打機只能夠用△及R掣，至於○、×則變為Start及Cancel鍵，最賤係L、R掣唔單只照抄，仲懶有創意咁將R掣變成相機快捷鍵㖭，唔通佢想暗示自己威過正牌PSP？
搞笑！影相、手寫、播片、聽歌乜都有
呢部V918喪抄PSP都未夠喉，仲加添幾分手機特色，好似想話你知佢厲害過PSP咁，相當搞笑！例如機身內置130萬像素相機、支援TouchScreen，跟機仲送埋一張256MBmicroSD畀你，小記就觀賞過內置MPEG4影片，估唔到可FullScreen播放之餘，畫面仲幾流暢，不過要鬧係手寫功能僅支援簡體，大部份香港人都唔識寫，有鬼用咩！但撇除老翻遊戲唔提，基本功能都算幾齊㗎！
充滿Bugs玩唔過
如果你貪呢款機有得影相，又可以聽歌睇片嘅話，咁嘅價錢實在算玩得過；之但係佢扮完PSP外形仲抄任天堂經典作，唔單只有可能侵犯咗對方版權，小記試玩過裏面啲Games仲鬼咁多「筆屎」（Bugs），玩唔玩得過自己諗啦！
第1宗：忽然Hang機
本來玩《炸彈人》打到㷫烚烚，點知臨KO最後一隻怪獸準備過關之際，忽然Hang機撈唔到，雖然冇令到手機都Hang埋，不過突然中止遊戲，絕對冇癮！
第2宗：孖寶唔跑
不嬲玩《瑪利奧》只要㩒住手掣再加方向鍵，主角就識得加速快跑，唔少關卡都靠呢招先過到版，點知呢度竟然一時時用到，就算高手都冇符啦！
第3宗：間中冇聲
有機迷講過如果打機冇晒聲，嚴重性相等於睇默劇，不過試玩完呢隻老翻《沙羅曼蛇》仲慘，佢會停吓又播吓背景音樂，呢啲就係老翻特色！
第4宗：秘技消失
講到《魂斗羅》最經典嘅30條生命秘技，細細個背熟到𠵱家仲記得，之但係老翻用唔番，齋靠幾次Continues想打爆機似乎相當艱難喎！
第5宗：畫面窒格
打機最基本要求係畫面流暢唔窒格，但係玩過呢隻幾講求反應嘅《Pacman》後，竟發現動作係一格格咁行，仲幾慢吓㖭，無疑增加咗過關難度！
手提Gamer有彈有讚
國產機踩過界都唔係第一次，但呢次唔止抄襲手提機外形，仲涉嫌侵犯遊戲版權，過晒火位，究竟一直玩緊手提機嘅Fans又點評價呢？
「冇乜興趣玩陳年舊Game，不過130萬像素相機、多媒體播放器及支援記憶卡更吸引，個價原來都係$1,400左右，都算抵玩！」
「玩過《炸彈人》，非常過癮，再睇番機身賣相真係幾掂，又薄又細細部，唔講都唔知係手機！」
「我見市面上好多手機Java遊戲已行緊3D，突然間叫我玩番經典遊戲唔係唔好，但肯定接受唔到部機窒格問題！」
PROFILE
制式：GSM900/1800
屏幕：26萬色輕觸式
體積：87×49×16mm
重量：約85g
主要功能：130萬像素相機、MP3鈴聲、音樂播放器、影片播放器、microSD卡槽、手寫輸入
售賣點：樂進（23806098）
