在《美女廚房》中以出色廚藝人氣急升的蘇玉華，近日頻獲廣告商垂青，日前她拍攝一冬蟲夏草平面廣告照片，短短4個多小時已淨袋6位數字酬勞，拍完廣告後更獲客戶送贈數萬元頂級冬蟲夏草，又食又拎，收穫甚豐。
近日忙於拍攝新劇《獄焰驚情》的蘇玉華，日前抽空為一品牌的冬蟲夏草拍廣告，雖然她要在廣告中轉換多個造型，包括律師、西藏姑娘及便服look等，但連化妝set頭換衫和拍照，全程只花了4個多小時便大功告成，如此順利，阿蘇表示還是頭一趟。
賺逾十萬
阿蘇說：「其實《美女廚房》之後，我嘅工作一直未停過，個期排得好密，幾經辛苦先至同劇集監製爭取到4個鐘頭拍廣告，咁緊迫，我梗係要爭取時間做到最好，但真係估唔到順利得咁緊要。」問到酬勞多少時，阿蘇只肯透露有6位數字，但表示拍完廣告照後，廣告商把約值數萬元的冬蟲夏草送給她和經理人，可算是額外收穫。
阿蘇又說：「其實今次接呢個廣告都好巧合，之前我幫TVB去西藏拍攝旅遊特輯，原來係盞記贊助，我去西藏嗰陣，個老闆都有一齊去，大家沿途幾啱傾，佢話嚟緊要搵人拍廣告，見到我真人之後覺得幾適合，跟住一返到香港即刻促成呢件事。」
採訪：林妃
