人類史上最大嘅招股活動──工商銀行（1398）招股，將會喺今日進入高潮。到底喺港股逼近歷史新高、但中資銀行股回軟嘅情況下，一眾股民點睇工行首日上市呢？
喺《香港討論區》，網友seasoul999話：「好多人話會升10至15%，我覺得可以喺一個星期內升25至30%。」
網友cy36hk就直情話：「我估計會開3.5元，然後去到3.7元，所以我會開市後掃貨。」另一網友ah_wil就話：「我會永遠持有！」睇嚟3個人都有抽工行，並且都係睇好後市嘅大好友。
呢個世界，有好友就當然有淡友啦，喺《XocatII》討論區，署名cyberken嘅網友就以專家口脗大潑冷水，數3個工行無運行嘅原因。
佢話：「第一，市值太大，唔易炒起；第二，衍生工具與正股同出，短期可能產生相互效應，但當大市掉轉方向時，對正股股價有好大壓力；第三，直到今日，我仍然對工行今次上市不予太大厚望。」
AH股有協同效應
網友cherryjasonchan好唔抵得咁話：「雖然冇一個必然嘅結論，但我相信A股同H股在同一日上市，會有協同效應。回想當初中行在A股上市時，招股價好似係大約3蚊，但上市當日最高曾升至接近4蚊，比起招股價升超過2成，我們真係唔可小看內地A股嘅炒作氣候。若工行A股能有大幅度嘅升幅，H股嘅走勢都唔會太過落後啩！」
證券商又點睇呢？輝立證券話，若果股價喺3.45元樓下，即市賬率為2.5倍，投資者可以考慮追貨，但若果股價升到3.99至4.13元嘅水位，即係2.9至3倍嘅市賬率，就建議投資者沽貨嘞！
睇完咁多理性同非理性嘅分析，相信大家都心中有數啦！