韋斯咸周二又輸波，外界一致認為「阿根廷孖寶」泰維斯同馬斯真蘭奴係「黑腳孖寶」，之前差啲累死巴甲球會哥連泰斯，𠵱家輪到「槌仔幫」……所謂「人夾人緣，波夾波緣」，你好波咩？都要夾出嚟，唔係想為呢兩位仁兄辯護，但睇過佢哋嘅昔日精華後，各位或會另眼相看！
過關斬將技術一流
南美波啲片出名質素差，但主要推介呢段名為《CarlosTevez》、長約10分鐘嘅短片，就尚可接受，而片內精華大部份都係泰維斯效力小保加時嘅世界波精華，當中不乏精采過關斬將、扭過龍門、「窩利」抽射等鏡頭。
仲有兩段泰維斯嘅入球片推介，分別係《Carlostevezcompilation》和《CarlitosTevez-Corinthians》，球迷可上「youtube.com」按名字搜尋，前者收錄了泰維斯喺小保加、哥連泰斯和國家隊嘅超級「士哥」，惜畫面一般；後者顧名思義係泰維斯效力哥連泰斯嘅演出，多次直搗黃龍確係少見㗎！
此外，泰維斯同胞馬斯真蘭奴嘅威水史，就叫《JavierMascherano》；畫面真係不敢恭維，但乍看之下，先發覺係「馬仔」嘅死硬派粉絲，錄低家中電視片段放上網！睇晒呢幾條片，了解「孖寶」多啲，先評價兩人都未遲！