金朝陽（878）周二停牌，涉出售物業，噚日復牌勁升23%至2.62元。公司宣布出售7項物業，總值2.45億元，較成本價1.41億元淨賺逾億元。有關物業與其話係投資物業，倒不如講係空置物業，因為來自該等逾5000平方呎嘅物業，月租收入只係22萬大元。
物業位置喺皇仁書院隔籬，面對維園，景觀的確幾好，不過以上物業幾乎全部係舊樓，但收購價卻較10月最新估值有21%溢價，除咗政府舊區重建，邊個會用咁高價錢收購舊樓？
原來買家係包玉剛後人持有嘅包氏基金，本來已持有附近若干地皮及物業，為擴大發展範圍，故積極收購附近物業，不惜以較慷慨價錢出價。呢批無乜租金收入嘅舊樓忽然可以變成2.45億「茄殊」，金朝陽都算時來運到。
單交易以全現金支付，所收現金幾近公司市值5.83億元嘅一半，集團每股資產淨值10.80元，現價計折讓幾近8成，相信係因為公司負債重，年中淨負債約10億元，來自金朝陽中心等物業每年收取逾億元租金收入，都被數千萬元利息開支所蠶食。
金朝陽嚟緊可以出售西貢及元朗地產項目，下一步或者可以諗諗將時代廣場對面嘅金朝陽中心用REIT方式出售套現還債。
深控（604）噚日宣布由對沖基金手中買入沿海家園（1124）可換股債及逾7%股權，刺激股價急升一成。深控自獲張化橋加盟後，近期動作多多，幾日前持有嘅路勁（1098）增持地產商順馳，好可能都係由張化橋做幕後軍師。
歐陽風