利物浦呢排唔淨止球隊成績差，就連球員嘅狀態都好沉，搞到領隊賓尼廸斯冇晒符，變陣又好、改派其他球員上陣都好，都唔見得有咩起色，眼見球隊咁嘅情況，賓帥都話贏聯賽錦標無望，索性將目標放喺爭取第5位就算數！
望重溫歐冠盃好夢
今季先至踢咗9輪賽事，季前被睇好嘅利物浦就已經輸咗4場，「英超4雄」之中率先脫腳，唔淨止球迷失望，就算係帶兵嘅賓帥都好似無心戀戰咁，直情話聯賽錦標已經唔係佢今季嘅目標，反而想好似前兩年咁，希望可以再次贏歐冠盃喎。咁又係，既然車路士、曼聯同埋阿仙奴都已經上晒軌道，要贏冠軍真係談何容易！
話晒歐冠盃都仲有排踢，而且佢哋喺分組賽嘅前景都相當樂觀，咁樣轉移球迷視線都好嘅，不過我求大俠就覺得佢將聯賽目標放喺第5位真係妄自菲薄咗啲，點睇紅軍有謝拉特、比拿美同埋古積特呢班球星喺度，爛船總有三斤釘，點可以咁快就放棄爭前4㗎！如果真係得第5嘅話，下屆咪要改踢歐協盃？如果真係咁樣，賓帥到時真係唔慌唔俾班利物浦球迷插死，隨時烏紗不保都唔奇呀！
「我求大俠就覺得賓帥咁講唔多唔少有啲激將法，話晒陣中班球員粒粒皆星，如果最後真係連『老4』都做唔到，點見班鄉親父老，知恥近乎勇，希望賓帥用心良苦可以有效啦！」