對好多香港人嚟講，自從港交所（388）容許賭業喺香港上市後，澳門即時由吃喝玩樂嘅層次，升格成有投資價值嘅層次。噚日喺《公眾投資168綜合論壇》嘅留言板上，就有人寓遊樂於投資，暢談濠江各大小賭場。
啱啱由澳門回港嘅網友stone話：「銀河娛樂（027）嘅星際剛開張，冇咩特別，好一般！行前就係永利，出邊個噴水池好勁，賭場入面就太多柱！信德（242）持有小小股份嘅葡京一如以往太雜，有好多蠱惑仔。奧瑪仕（959）間希臘神話唔錯，不過較遠！個人覺得金沙最好，壯觀地點又好！賭場雖然開多了，但都不減人流，長線都係賺硬。」
話自己都到過各大賭場嘅cy8就同星際平反，話：「剛剛到過星際，以銀河咁多個場嚟講，算比我想像中好，呢個旗艦場都未算太失色，當然不及金沙及永利，葡京對面咪起緊新葡京，第時會貫通新舊，不過，葡京啲荷官就真係仍然寸過乜，個個都好似想趕客咁款。」
咁大家覺得仲有冇發展空間呢？
愚者就回應：「賺係賺硬嘅，但現在覺得澳門賭業有少少泡沫，真係要睇得好長線，重點係大陸有錢人嘅增長速度要快過賭場嘅擴張速度，短線而言，賭場已太多，如果現在經濟突然放緩，應該會有幾間經營不善嘅賭場摺埋（因為賭場經營成本都唔輕），新加入的賭場如果要分得市場份額都很困難……」
證券行又點睇
摩根士丹利噚日就澳門賭業發表研究報告，話今年第3季度（7至9月），當地賭場收入增幅有19%，達132.6億元，符合間行嘅預期。其中高消費嘅貴賓廳表現更高過間行預期，呢個類別嘅增幅9%，金額達73.94億元，是05年2月以來最強勁嘅升幅。大摩維持全年賭場收入達530.4億元嘅預測，即第4季度預測增幅為16%。
至於個別股份嘅看法，大摩維持對各濠賭股評級。如銀河娛樂，該行畀「持有」評級，目標價7.2元；新濠（200）就畀「減持」評級，目標價11.7元；該行唯一畀信德「增持」評級，目標價11.7元。