富豪第二代索女之一，玩具大王蔡志明孻女蔡加怡，雖然傷風在身，噚日都堅持同記者食個lunch見見面。芳齡25嘅蔡加怡年紀輕輕就已經拎咗兩張沙紙，分別係波士頓大學嘅大學學位同香港理大嘅企業財務碩士學位。雖然唔係讀醫出身，不過空降康健醫療科技都係為幫老竇睇住盤數啫，啱晒讀數嘅佢。
上任未夠一年，就已經幫公司完成咗幾項收購，將公司股價由仙股變毫子股，執董蕭錦秋仲踢爆蔡小姐善於投資，連全城陷入瘋狂嘅工行都大手抽，既用自己名義抽，又同老竇夾份抽，仲諗住長揸唔放手。蔡小姐人靚又冇乜架子，當然不乏裙下之臣啦，華華問佢有冇新戀情透露吓，佢就甜絲絲咁話，私人問題唔答，下次私人宴會時再同華華傾喎。