廣船（317）今年全年表現標青，1月仲喺1.50元樓下橫行，眨吓眼升咗5倍，如坐飛船。雖然升咗咁多，但仍無損散戶入市興致，隻股噚日收8.93元，升3仙。
喺《Yahoo討論區》內，網友winnie高呼：「廣船好！我買咗，決定長期持有。之前賺過幾轉啦。」金錢龜對此不以為然：「工行（1398）一出，萬股皆瀉，還有兩天偷雞時……一字記之，『貴』貨必輸……1.X→7.X貴貴貴貴貴貴。」
對於金錢龜的「忠告」，winnie未太在意：「買少少應該唔怕啩，A股嗰邊升到15蚊啦。」
廣船主業係建造及銷售船舶；提供修理船隻服務；同埋製造及銷售鋼結構及機電設備。集團今年8月中公布中期業績，純利大升1.4倍。受惠於新船需求增加，加上人工成本偏低，有利取得海外定單，集團預測第3季純利將急漲5倍。展望未來，喺8月完成擴充船廠後，產能將會增加，係另一個利好因素。
集團喺內地掛牌嘅A股，呢排股價升到收唔到掣，噚日再創15.20元人民幣新高，收市報15.04元人民幣，有5%進賬，相對之下，H股股價由高位回咗超過一成，應該有投機一博價值。
隻股今年1月由1.45元低位起步，升到4月高位5.60元，經過兩個多月整固後再向上衝至7.90元，之後喺6.80元至7.65元之間橫行整固兩個多月，直至今個月才再次發力。上星期最高見9.93元，近日回吐，如果跌近保歷加通道中軸8.30元，可小注吸納，博衝破10蚊再展另一升浪，但如果跌穿七八月間雙頂阻力7.90元，必須先止蝕。
余文