美國聯儲局議息期間美股市況好似Program咗咁，好似跟晒公式行，議息結果公布前，個市靜番啲，油價推番高啲，搞到港股冇晒方向感。不過昨晚議息完畢，今日港股應該好炒啲。
港股昨日靜如深海，上晝指數冇乜大變化，仲係靠隻中移動（941）撐場，好多喺金魚缸邊睇市嘅炒家都瞓着晒，幾十億勾塊地皮出嚟，啲地產股都唔表演吓。國企股就算係郁嗰啲股份，都好似郁得好保守，跟炒嘅唔係好進取。油價同金價呢幾日好飄，炒家都好謹慎，唔會輕率亂炒。啱嘅，𠵱家個市搵餐晏仔都唔係好易，小心啲係啱嘅。
唔少股民都有抽工行（1398），但反應太踴躍，只認購1手，10個人就先得7個人有份，之不過如果抽中咗，應該都可以輕輕鬆鬆搵餐晏仔，有老友問聽日掛牌，應該係買定係沽，照睇工行上市之後好有機會炒上4蚊樓上，大家可能要等多幾日或者1個禮拜，先見到呢個價，但係跌番落招股價嘅機會就唔會好大，如果抽到1手，喺3.6元樓下買多手，值博率都幾好。
中石化C輪2205：自從中石化（386）突破5.1元阻力位後，走勢愈來愈對辦，升勢緩而有序，昨日企喺5.31元收市，再升0.37%，明確向上嘅方向，但係唔會太急，減少咗啲震盪。隻中石化C輪2205，昨收37仙，仲有155日先到期，溢價10.5%，槓桿率14.4倍（有效7.2倍），對沖值0.498，正股短線睇5.75元，破位睇6元，隻輪屬平價輪，正股再升，值博率會更吸引，正股升上5.75元同埋6元，2205應該唔會低過60仙同埋76仙，正股跌穿5.2元止蝕。
俊樺