華華喺7月時寫過，人稱褲王嘅旭日企業（393）主席楊釗，可能因為生意多同埋公職重多嘅關係，作為I.T（999）非執董嘅佢，居然5次董事會1次都冇出席過。噚日佢終於作出回應啦，就係決定辭咗非執董一職，原因就係今年非常流行、男女合用童叟無欺嘅「私人理由」。
有啲想壞心腸嘅市場人士話，楊釗辭咗I.T嘅非執董，會唔會係旭日同I.T間合資公司玩完嘅先兆呢？華華打探過，根本冇啲咁嘅事，起碼噚日就冇咁嘅計劃。華華諗落，都覺得呢個揣測企唔住腳，因為前排I.T先至猛同人講，間合資公司幾咁掂，唔會轉過頭就摺埋佢啩？
不過，原本由7人組成嘅董事局，𠵱家變成6個人，當中兩個係兄弟，連埋今年升做副主席嘅盧永仁，就有兩個董事係受薪，唔知重可唔可以做到年報中嗰句──「確保有關權力及權能充份平衡」嘅遠景目標呢？