買樓係人生重要投資，上車客就更加多嘢諗，屯門有個買樓初哥，竟然前後睇咗過百個單位先至扑鎚，如此小心謹慎兼咁忍得手，真係抵佢買到平價筍貨。祥益林偉光話個上車客早輪集中喺屯門市中心、大興花園同埋碼頭區一帶睇樓，密集式睇咗過百個單位，結果揀咗樓齡相對較新嘅南浪海灣，正式結束「睇樓特訓」，榮升業主。
點解千揀萬揀，最後會揀中南浪海灣？林偉光解釋最重要係業主肯大幅減價，打動咗買家嘅執平貨心態。至於個單位就係1座低層B室，750呎，成交價138萬元，一方面比市價平8%；同時亦比原先開價劈咗10萬銀，減幅近7%，以細價樓嚟講都好緊要吓。
不過，正所謂百貨撞百客，對於一啲買樓當買菜嘅投資客嚟講，只要個價合心意兼平過市價，隨時一睇即買。中原潘志江話東涌映灣園2座高層E室，722呎，有個區內業主睇完樓即時以167萬元承接，平過市價5%。
映灣買家即睇即買
對經紀嚟講，兩單生意都係百幾萬樓，一個就即睇即買即袋佣，另一個就行到腳都軟先開到單，真係同人唔同命。
電郵地址：[email protected]