今個禮拜五，新股王工商銀行上市儀式，將會喺港滬兩地同日舉行，由於集資額冠絕全球，而且係首家以「A+H」形式同步招股、同日掛牌上市的大型新股，有關方面喺準備上市儀式方面，自然要嚴陣以待。
由於上海證券交易所嘅交易時間，係由朝早9點半開始，香港方面，禮拜五朝早將直播上交所喺9點15分舉行的A股上市儀式，而香港嘅H股上市儀式將遲25分鐘，即係9點40分舉行。如要率先知道工行首日掛牌表現如何，不妨先留意A股市場。
至於出席上市儀式嘅嘉賓，煲呔曾蔭權首次以特首身份做主禮嘉賓，參加工行喺聯交所交易大廳舉行的H股上市儀式，成為大熱話題，預計屆時場面將會更「墟冚」；除此之外，內地監管機構嘅代表亦好可能會出席上市儀式；工行管理層──董事長姜建清同行長楊凱生，將會兵分兩路，分別出席喺香港同埋上海嘅H股和A股上市儀式。
華華翻查紀錄，發現當年煲呔曾都曾以司長身份，出席地鐵嘅上市儀式，至於當時嘅特首董建華，亦曾經到過港交所嘅上市儀式，不過呢兩間都係本地機構，H股嚟講，今次係破天荒。