大教授請吃晚飯，宴請高人與遠方來客，高人食齋已久，不吃肉，大教授想盡辦法，卒之搵到著名素食店老闆答應，派人到大教授家裏到會，供應上海式齋菜。左丁山都唔記得上次食齋係幾多年前咯，今次有機會試試名店到會，原來有成十款咁多，加埋第十一味，苔條崧子炒飯，第十二款芝麻湯圓，真係食到飽一飽，西人食素，相信冇咁多美味花款。
高人嘅廣東話係識聽唔識講，佢講上海話，阿拉弗懂，於是冇機會向佢請教。遠方來客講英語，於是呢晚上海話、廣東話、英語交叉運用。既然唔識與高人溝通，於是同遠方來客傾多幾句，原來佢係大教授之學生。三十年前喺美國攻讀經濟學博士，大教授就係佢嘅第二導師。來客攞咗博士學位，回國投身傳媒，今為大出版社/大報社長，佢講到全世界報紙嘅銷路都下跌，廣告畀互聯網站搶去，擔心之情，溢於言表。碰啱呢位來客係傳媒同行，左丁山梗係識少少，扮代表啦，同佢介紹香港傳媒大勢。來客話：「我知道香港有一位JimmyLai，辦張AppleDaily好成功，但去到台灣就唔夠《聯合報》、《中國時報》競爭，蝕大本。」左丁山連忙糾正之：「你啲資訊比較滯後，《蘋果》嘅控投公司叫做『壹傳媒』，係上市公司，你上網一查就知道呢間公司賺唔少錢，台灣《壹週刊》與《蘋果日報》都係台灣第一。」來客話：「唔係噃，台灣朋友講畀我聽，《聯合》、《中時》兩大報各自日銷一百萬份，點會細得過《蘋果日報》？」左丁山為之失笑，叫佢自己去台灣研究吓。
來客好嚴肅咁講：「聽君之言，我要好好地研究JimmyLai嘅方法，會派人去台灣查找實據。」咁就啱聽，沒有調查就沒有發言權吖嘛。如果誤信人言，以為黎智英喺台灣蝕大本，俾《聯合報》、《中國時報》打殘咗，點似做大出版社/報社嘅社長呀。
一餐齋菜，竟然食咗兩個幾鐘頭，大家連忙告辭，與高人握手拜拜之時，見佢八十幾歲，精神奕奕，似尊活佛，嘆為觀止矣。