熱爆全球嘅工商銀行（1398）都仲未上市，網民peggybee1已急不及待討論同埋期待佢會唔會吞併建行（939）同中行（3988），以至連股改都未做嘅農行。peggybee1仲同佢地哋埋名㖭，叫做「中國工商建設農業銀行」喎，之不過，成事機會有幾高？就各人有唔同睇法嘞。
內地銀行大合併
happyma就話peggybee1「發夢中」，網民鄙人亦認為「天下儍人何其多！不如發夢交行（3328）收購滙控（005）」；easywin相信係要收購都走去收購外國銀行啦。
不過，peggybee1亦有支持者，yylam713同埋chip1就認為世事無嘢冇可能，話冇可能嘅人，只不過係見得世面少啫。
chip1更認為，尤其響中國開放銀行業後，要同外國競爭，合併並非天方夜譚，東京三菱之前都同日本聯合銀行合併啦，而且全球銀行市值排第二位美國嘅摩根大通，都係合併嘅成果！各國銀行殺到入去，佢哋四大巨頭與其自相殘殺，不如互相合作好過，情況就好似𠵱家內地電器零售市場咁喎。
不過，農行盤數就係人都知幾咁唔掂，佢搞笑咁話：「農行？可能阿公送畀大生銀行都唔要。大生應該是全港最細嘅銀行。」
咁又係，合併係迅速壯大最佳方法，但係yylame713就估會係好長遠嘅事；自動售票機仲悲觀，話唔知有無咁長命睇得到囉。