香港大學醫學院近期可謂多事之秋，除咗外科學系內鬥外，好衰唔衰院長林兆鑫又周圍得罪人，搞到要大學校長徐立之親自帶隊，擺和頭酒。
事緣約兩個月前，林兆鑫喺一份英文報章撰文，明讚自己醫學院好叻，暗踩私家醫生同醫院質素差，辣㷫全個私營醫療界。香港醫學會隨即寫信去報紙，反駁S.K.林嘅講法，其後不少醫療中人，更寫信畀徐立之，投訴S.K.林嘅狂妄自大。徐立之為咗息事寧人，親自喺中環擺和頭酒，仲帶埋S.K.林、副院長梁憲孫同幾位高層，邀請咗醫學會會長蔡堅，同多位私家醫院院長。
席間徐立之話，其實醫學院好關心私營醫療發展，絕對冇貶低之意，但S.K.林死不認錯，毫無誠意道歉，令醫生餐飯由背脊骨落。
之後曾經有醫生話，S.K.林貶低同業，違反註冊醫生專業守則，要去醫委會告佢，不過最後都算數。S.K.林之前為咗誠哥嗰10億，出賣醫學院，已經有好多人唔妥佢到𠵱家，如果再亂講嘢，可能冇人幫到佢。