近排二手市況唔算太活躍，不過耐唔耐都有啲高價成交，全靠個別買家不吝價錢買入心頭好，好似北角健威花園啱啱就有單高市價一成嘅成交，買家係狗癡，為咗愛犬有多啲地方走動，睇咗區內唔少連天台或花園單位，終於畀佢搵到間啱心水嘅，梗係唔介意畀多少少啦。
高市價一成
世紀21日昇董事黃文龍話，個F座頂樓514呎單位，連400呎天台，成交價238萬，呎價4630蚊，比同類單位貴一成；不過買家見到個天台，好啱佢隻狗住，加上成個屋苑再無第二間連天台放盤，明知貴咗都照買。
雖然以高價成交，但原業主喺94年以264萬買入，揸咗12年，蝕26萬離場。黃文龍話健威今個月有5宗成交，平均呎價3800蚊。