道指不斷挑戰新高，伎倆不外乎一招「單天保至尊」。繼早前利用Altria（卡夫和煙草商PhilipMorris的母公司）和Caterpillar（開山劈石機械製造商）將之托住後，日前更「撻」着隻IBM，便將指數推高至企穩在12,000點之上。
至此，30隻成份股中，不少「大老倌」已先後亮相兼「撐場」，無論甚麼不符理想盈利或壞消息，都無法將道指壓回萬二點之下收市，你話奇唔奇？難道隻隻都係「天」乎？
前日道指低開，但不旋踵已收復失地，之後更是穩步向上，收市更勁升114點或近1%，升幅乃近期少見。為甚麼犀利如斯？難道經濟Goldilock（不冷不熱的理想狀況）重現？
非也！Goldilock已成過去，現在是側埋一面，不過「三劍俠」（財長保爾森和聯儲局正副主席）力挽狂瀾，側邊面都頂得住，直到中期大選後再算。
信不信由你，然而，「有心人」有見及此，又怎不使出渾身解數配合？只要托高道指，哪怕其他不跟風嗎？由是者，在30隻成份股中「點指兵兵」，輪流出場，雖然部份老、弱、殘，但一經「化裝」（快近Halleween啦！），仲醒過梁醒波。
老病傷殘亦起作用
不是嗎？殘如通用汽車（GM），居然可以成為道指衝上雲霄的「單天」，股價周一勁升5.55%，是成份股中最大升幅，理由是福特汽車（Ford）如果「唔掂」，便益晒通用。此時不買，更待何時？如此藉口，可有令閣下歎為觀止，拍案叫絕？
要升超過一百點，靠「單天」似乎有點危險，故出多隻「天」，便是沃爾瑪（Wal-Mart）也。沃爾瑪股價升3.87%，乃第2大升幅成份股，理由是該集團聲稱將減少資本性開支。市場即時詮釋為「有效率投資」。
嘩！咁都得？如果要個市「冧」，汝道這句話可否被解讀為減少投資或「唔掂」？總之好戲在後頭，請勿走開！！
王冠一