賭王何鴻燊及周啓邦夫婦等前晚到金鐘，出席Audi旗艦店陳列室開幕活動，賭王先與記者談車經說：「外國車梗係好鋼水啲，德國車撞都冇事，日本車一撞就渣都冇得剩。以前我個女喺美國撞車，好彩佢揸歐洲車，架車反幾個圈都冇事。」
讚愈睇愈靚女
問賭王以前揸車追女仔的趣事時，他牙擦地說：「都好耐世界嘅事啦，冇乜大困難，想追邊個就邊個啦。」他又自爆周六（28號）會在二姨太藍瓊纓家為孫女（指兒子猷龍的女兒）開梓擺滿月酒，他說：「阿梓真係愈睇愈靚女。」為孫女改名開梓是否真的希望媳婦下一胎「開子」？他說：「咁都俾你哋估到。」
至於剛做了眼角膜手術的周啓邦戴上墨鏡示人，他說：「以前後生有次喺劍橋開車去倫敦，點知炒車，成塊面腫晒，好似隻鬼咁。」
採訪、攝影：GeneNg