深水埗區除買電腦平之外，原來食嘢都好平，最近喺區內發現開張約兩星期的石屋日本料理，為咗吸引大家幫襯，推出$10碟6件反卷，件件直徑有成2吋闊，食一碟都飽到反肚，每枱可Order3碟，擺到明賣大包益街坊，名副其實係「一分錢六分貨，大件夾抵食！」
記者︰方綺君 攝影︰陳盛臣
Model︰Carol、Kitty
反卷壽司同區至平
要喺深水埗區搵一間日本料理食飯真係易如反掌，新嚟新豬肉嘅石屋要突圍而出，就推出平價食品，吸引客人注意，先攞頭彩。不過平還平，嘴刁的香港人始終要平又要靚，味道差嘅話，就算抵到爛都只係幫襯一次，所以負責人Andy話︰「我哋絕對唔會畀次貨啲客人食，刺身係每日由日本築地空運到港，而且反卷壽司份量一定唔會比同區其他日本料理店少。」當見到反卷時都忍唔住瞪大眼，原價三十幾蚊的反卷壽司只賣$10，一碟碟放上枱的炸蝦加州反卷、芝心吉列蠔反卷和三文魚加州反卷碟碟都有6件，份量十足，直徑足有兩吋，真係食到嘴仔變形，我諗同區無人能及。
炸蝦加州反卷
原價$38特價$10
唔係用新鮮炸蝦包住就咁簡單，外面再包一層軟軟的芝士皮，令到賣相和味道都更加突出，芝士味停留在口腔，食完回味無窮。
三文魚加州反卷
原價$35特價$10
此反卷雖然不算特別，不過勝在一碟6件夠睇頭，且睇得出師傅唔會因為價錢平而偷工減料。
芝心吉列蠔反卷
原價$38特價$10
喺日本岩蠔中間再加入芝心，咬一啖熱辣辣的芝士溶流入口，加埋多汁的岩蠔，好食到停唔到口。
脆炸豬扒反卷
原價$30特價$10
即炸豬扒就咁食已經好香口，再加番茄、蟹子等一齊做成反卷，份量夠大，直徑接近兩吋，感覺真係好抵食。
美食減價當宣傳
不但反卷，店中其他美食如芝士軟殼蟹焗飯和特色炒辣蜆等都減價迎賓，我問Andy︰「通常都係一分錢一分貨，要食靚嘢就要畀多啲錢，點解可以做到咁平？有冇咁大隻蛤乸隨街跳？」Andy話︰「新開張唔好計咁多，就當做宣傳，亦都俾多啲街坊知道石屋嘅食物水準係咁高，同埋咁好食。」知道深水埗區仲有好多日本料理，睇嚟石屋雄心勃勃要在深水埗區大展拳腳，不過唔奇吖，各大超市周不時都有減價戰啦！
特色炒辣蜆
原價$40特價$20
非常有大牌檔風味的炒辣蜆辣味十足，巴辣中又帶少許麻辣，用炸蒜炒過份外香，邊呷清酒，好梳乎呀！
七彩魚生冷麵
原價$68特價$40
配搭冷麵的魚生會根據當造期來決定種類，最特別係師傅自己調校的Wasabi味沙律油，和冷拉麵拌勻後入口惹味又攻鼻。
芝士軟殼蟹焗飯
原價$45特價$40
焗飯面鋪滿特製芝士醬，用牛奶、牛油和蒜茸煮過的芝士好Creamy和幼滑，芝士醬包住炒飯和原隻軟殼蟹，食過翻尋味。
兩人建議菜單
芝士軟殼蟹焗飯 $30
芝心吉列蠔反卷 $10
特色炒辣蜆 $20
總數 $60
每人平均消費 $30
如果唔介意少款，反而只想食多幾款反卷，一於淨係叫晒三個不同款式的$10反卷，埋單落樓只係$30，每人$15，其實都已經夠飽。
食客有Say
搵食攻略
石屋（27480800）
地址︰深水埗大埔道87至91號地下
營業時間︰12:00nn-3:00pm；6:00pm-12:00mn
交通︰深水埗地鐵站B2出口，到地面後直行到大埔道街口左轉，步行約5分鐘。
註：全日免收加一。
優惠只做一星期，只適用於晚市時段。
