美聯集團前副主席張錦成離職後，過完冷河，正式另起爐灶，噚日搵咗班記者食飯，介紹新公司盈富物業畀大家識。其他3個細股東兼舊同事王偉榮、黎偉強同鄧天勇都齊齊亮相。
新任主席嘅張錦成心情相當好，聽佢講集團𠵱家有10間分行同1間總行，部份已經有錢賺，仲話計劃未來一季喺中半山、東西半山同跑馬地開多3至4間，希望一年後分行達30至50間；第二階段係拓展投資部同工商舖部，第三階段會進軍澳門同內地市場，最終目標係上市。
盈富𠵱家有150人，全部係行內有經驗同有戰績嘅，張錦成話暫時未諗住請新人。而前線底薪6000蚊到1萬，拆佣最多達50%，比市價嘅30至40%高。
公司主力做豪宅同成交量多嘅屋邨代理，當中豪宅佣金佔咗七成；另外，佢哋都冇放棄只佔三成收入嘅一手代理，張錦成爆料話同發展商關係非常良好，絕大部份都肯畀一手樓佢哋做，睇嚟中美兩大集團有勁敵嘞。