煲呔最鍾意向工聯會陳婉嫻送高帽，成日嫻姐前嫻姐後，無他嘅，工聯會坐擁幾十萬會員，唔巴結吓又點得呢？
估唔到唐唐都好似受咗煲呔感染咁，噚日喺一個銷售稅公開論壇上，都表現得對嫻姐極度尊敬，除咗成日尊稱佢做嫻姐外，喺開場白度已經開始擦鞋，話雖然立法會上星期通過反對開徵銷售稅建議，但最難得係投咗反對票嘅嫻姐，都肯繼續出席論壇同佢哋傾吓有乜嘢擴闊稅基嘅好方法，睇嚟冇因為銷售稅同嫻姐反目成仇喎。
講開唐唐，雖然喺立法會遇到滑鐵盧，但係心情好似未受影響，噚日喺論壇表現得幾風騷，仲暗寸台下發言嘉賓、反對銷售稅大聯盟副主席黃家和一味反對但冇具體擴闊稅基建議，唔通因為立法會個反銷售稅動議冇約束力，令唐唐完全唔放喺心？