孫柏文噚日都講過，除咗係孟加拉間「鄉村銀行」之外，我哋特區都有啲用「社群壓力」迫還款嘅細金額融資渠道。呢條融資渠道，就係叫「做會」。不過，因為孫柏文都知道好多70年代末之後出世嘅fan屎，完全唔知道「做會」為何物，所以今日我就希望為呢班後生仔女解釋一下乜嘢叫「做會」。
首先，以下有一個「做會」表，幫助解釋「做會」中借錢同還款過程。今次呢個例子，就有四個人參與，Auntie（A）、B女（B）、師奶C（C）同Debtor（D）。今次四個人參與「做會」嘅原因，就係Debtor幫女朋友買手袋買到「碌爆卡」，頂唔順啲息，所以問Auntie借錢。點知，Auntie唔夠錢借畀Debtor，所以提議幫Debtor「做個會」，由Auntie管理，亦即變成「會頭」。
Debtor需要借$300，Auntie、B女同師奶C就每人夾$100「供會」借畀佢，Debtor之後每個月還$100畀個「會」。到第二個月，首先Debtor還$100，跟住Auntie、B女同師奶C就會「出標」makeabid去嘗試「標會」，「標會」嘅意思係解為「要將呢期大家集來嘅錢攞去」。
大家可能會問：「如何決定邊個人嘅『標』可以『標會』？」其實，Auntie、B女同師奶C每人都會出一個暗標，寫低一個銀碼。出最高銀碼嘅「標」，就可以成功「標會」。不過，標上面嘅銀碼，就會變成啲未標過會嘅人，嗰期「供會」嘅折扣。例如用以下個表嘅例子，第二期個「會」出最高銀碼嘅「標」，就係來自要交學費嘅B女，佢就出$5「標」。所以，未標過會嘅Auntie同師奶C，嗰期每人都只需要供$95就夠，而第一期已經標咗會嘅Debtor就還$100，B女亦得到$290。
到第三期，Auntie要抽工行新股，所以就出最高銀碼$10嘅「標」。未標過會嘅師奶C就要供$90，而已經標咗會嘅Debtor同B女就每人還$100，Auntie亦得到$290。到最後嗰期，因為得番師奶C未標會，所以自動「標會」，其他標咗會嘅人就每人還$100，師奶C亦得$300。
大家可能會問：「點解『做會』有吸引力？」其實，以前個人貸款比較困難，除咗幫襯大耳窿、當舖之外，基本上冇乜選擇。按以上嘅例子，參加一個會既可以當儲蓄，又可以當一條creditline。好似師奶C，三個月總成本都之不過係$285，就可以賺取$15，即係每年有21厘利息回報。B女就只需要付出$10，咁就可以即時有$290周轉。所以可以話我哋特區甚麼階層都擁有高強嘅「財技」。
最後，大家可能會問：「點解會有人肯幫啲債仔一齊去做會？」其實，如果你今日唔肯幫人，他朝你需要用錢嘅時候，又會有邊個肯幫你？